२३ चैत २०८१, आइतवार
झापा, १५ माघ । जैविक विविधताले भरिपूर्ण दक्षिण झापाको जलथल वनमा १५५ प्रजातिका रुख फेला परेकोे छ ।
बनस्पतिविद् डा. लीलानाथ शर्माले खोज गरेर ती रुखहरु पत्ता लगाउनु भएको हो ।
जिल्लाको कचनकवल, बाह्रदशी, हल्दिबारी गाउँपालिका र भद्रपुर नगरपालिकासम्म फैलिएको जलथलको २२ वटा सामुदायिक वन क्षेत्रमा नेपालमा पाइनेमध्ये २५ प्रतिशत विभिन्न प्रजातिका रुखहरु अध्ययनका क्रममा पाइएको उहाँले बताउनुभयो ।
नेपालमा पाइने ७०० रुखहरुमध्ये १५५ प्रजाति यहाँ पाइएको उहाँको भनाई छ ।
उहाँले फरेस्ट एक्सन नेपालको नेतृत्वमा सो क्षेत्रका वनहरुमा पाइने विविधताको अध्ययन गरिएको जानकारी दिनुभयो ।
चारकोशे जंगलको फडानी हुनबाट बचेको एक खण्ड जलथल वन छ हजार १०० हेक्टर क्षेत्रफलमा फैलिएको छ ।
सो क्षेत्रमा गरिएको अध्ययनमा उहाँलगायत डा. भास्कर अधिकारी, योगेन्द्र विक्रम पौडेलले जलथल वनको जैविक विविधता बारेमा भारतबाट प्रकाशित हुने ’प्लियोने’ नामक विधागत जर्नलको पछिल्लो अंकमा सो कुराको अभिलेखीकरण गर्नुभएको छ ।
डा। शर्माले भन्नुभयो, “जलथल वनका रुखहरुका बारेमा लगभग अभिलेख पूरा भएको छ तर पनि थप अध्ययन गर्ने क्रम जारी छ अन्य प्रजाति पनि थप हुने सम्भावनालाई नकार्न मिल्दैन ।”
रुखहरुको प्रजातीय विविधताको आधारमा जलथललाई रुखहरुको राजधानी भन्दा पनि फरक नहुने उहाँको कथन छ ।
देशभरमा तुलतात्मक अध्ययन गर्ने हो भने रुखहरुको प्रजातीय विविधताको दृष्टिकोणले जलथल नेपालकै सबैभन्दा धनी क्षेत्र हुन सक्ने उहाँको दाबी छ । जलथलमा लटहर, थाकल, लाली, पाँचफल, हार्पुलिया आदि जस्ता दक्षिणपूर्वी एशियामा प्रचुर मात्रामा पाइने रुखका प्रजातिहरु पाइएका छन् ।
