२१ चैत २०८१, शुक्रवार
झापा, १४ फागुन । पूर्वीनाका काँकडभिट्टास्थित सडकको भित्तोलाई नेपालमा पाइने जनावर र चराहरुको आकर्षक चित्रले सजाइएको छ ।
आजदेखि सुरु भएको ‘कला साहित्य उत्सव : पर्यावरण विमर्श’को सन्दर्भ पारेर रिडर्स झापाले नाकाको सडकको भित्तालाई चित्रकलाले रङ्ग्याएको हो । पर्यावरणविद् उत्तमबाबु श्रेष्ठको कि नोट स्पीचसँगै उत्सवको सुरुवात भएको थियो ।
देही आर्टका संस्थापक सागर मगरले सडकको भित्तामा स्थानीय १२ जना चित्रकारले ५० वटा अलगअलग चित्र कोरेको बताउनुभयो । “चित्र कोर्नका लागि कलाकारहरुले कुनै पारिश्रमिक लिएका छैनौं,” चित्रकार मगरले भन्नुभयो–“किनकि, काँकडभिट्टामा कला साहित्य उत्सवका लागि देश विदेशबाट पाहुनाहरु आउनु भएको छ । हामी उहाँहरुलाई आफ्नो मुलुकको पहिचानसहितको कला देखाउन चाहन्छौं ।”
आयोजक रिडर्स झापाले फागुन १४ देखि १६ गतेसम्म आयोजना हुने यसवर्षको कला साहित्य उत्सवलाई पर्यावरणको विषयमा केन्द्रित गर्ने भएको छ । त्यही सन्दर्भलाई जोड्दै देही आर्टका चित्रकारहरुले रातोदिन लगाएर भित्तेलेखन गरेका छन् ।
साहित्यकार डा. सञ्जीव उप्रेती र अर्चना थापाले कलाकारहरुको भित्तेलेखनले मनमोहक मेची सीमाको सडक अवलोकन गर्नुभयो । उत्सवमा भारतको लद्दाखका प्रसिद्ध पर्यावरण अभियन्ता सोनाम वाङचुक समेत सहभागी हुने रिडर्स झापाका अध्यक्ष शैलेश दाहालले बताउनुभयो ।
कलाकारहरुले सडकको भित्तामा नेपालमा पाइने एकसिंगे गैडा, लामचुच्चे मुख भएको घडियाल गोही, भीमकाय हात्ती, डल्फिन, अजिंगर लगायतका जनावरको रंििगन चित्र कोरेका छन् । नेपाली मौलिकता झल्काउने टाढे घर, ढुंगे धारा, चरा र पुतलीको समेत चित्र भित्तामा कोरिएका छन् ।
काँकडभिट्टा खानेपानी कार्यालयको सभाहलमा उत्सवका अधिकांश कार्यक्रमहरु सञ्चालन हुने भए तापनि कतिपय विमर्श कार्यक्रमलाई सहरबाट बाहिर बाहुनडाँगीको हात्ती प्रभावित ग्रामीण क्षेत्रमा लगिएको रिडर्स झापाका सदस्य सन्दिप ओलीले बताउनुभयो ।
उत्सवमा सन्धिपुर नामक नाटकको मञ्चन, चरा तथा हात्तीको फोटो प्रदर्शनी, अन्तरक्रियात्मक विमर्श, पर्यावरण सम्भाषण लगायतका कार्यक्रमहरु राखिएका छन् ।
वि.सं. २०५९ देखि काँकडभिट्टामा आयोजना हुन थालेको साहित्य कला उत्सव कोरोना महामारीपछि स्थगित रहँदै आएकोमा यसपाली आयोजना भएको हो ।
