२२ चैत २०८१, शनिवार
झापा, २० फागुन । विर्तामोड नगरपालिकाको नवागन्तुक प्रमुख प्रशासकीय अधिकृत सागर मिश्रले विर्तामोडका समस्याहरु आफुलाई भलिभाती जानकारी रहेको भन्दै जनप्रतिनिधि र कर्मचारीबीच बलियो पुलको काम गर्ने बताउनु भएको छ।
काठमाडौंको कागेश्वर मनोहरा नगरपालिकाबाट विर्तामोड आउनु भएका मिश्रलाई स्वागत गर्नका लागि आयोजित कार्यक्रममा उहाँले विकास निर्माणको काममा कर्मचारीको तर्फबाट सँधै सहयोगीको भूमिका रहने प्रतिवद्धता व्यक्त गर्नु भएको छ ।
उहाँले कर्मचारीहरुलाई कुनै समस्या भए आफुसँग आउन आग्रह गर्नुभयो । यसअघि मिलनकुमार भट्टराई प्रमुख प्रशासकीय अधिकृतको रुपमा अत्यन्तै छोटो अवधि विर्तामोडमा बस्नु भएको थियो ।
कर्मचारी र जनप्रतिनिधिको तालमेल मिलाउन नसकेर भट्टराई विर्तामोडमा नटिकेको चर्चा भइरहेका बेला सो जिम्मेवारीमा आउनु भएको मिश्र झापाकै स्थानीय र काबिल प्रशासक हुनुहुन्छ ।
विभिन्न जिल्लामा प्रमुख जिल्ला अधिकारी, स्थानीय विकास अधिकारी र प्रमुख प्रशासकीय अधिकृतको जिम्मेवारी सफलतापूर्वक निर्वाह गरिसक्नु भएको उहाँको विर्तामोड आगमनलाई नगरबासी, नगरका जनप्रतिनिधि र कर्मचारी वर्गले सुखद् मानेका छन् ।
विर्तामोडमा कर्मचारीबाट असहयोग भएको भनेर जनप्रतिनिधिको गुनासो रहँदै आएको छ भने जनप्रतिनिधिहरुबाट अनुचित दवावमा रहेर काम गर्नुपरेको प्रमुख प्रशासकीय अधिकृतको गुनासो रहने गरेको छ ।
स्वागत कार्यक्रममा बोल्ने क्रममा कार्यवाहक नगरप्रमुख नगेन्द्र संग्रौलाले प्रक्रिया पूरा गरेर आएका जनताका काम नरोक्न र राजनीति नगर्न कर्मचारीहरुलाई सुझाव राख्नु भएको थियो ।
प्रमुख प्रशासकीय अधिकृत मिश्रले विर्तामोडमा जनप्रतिनिधि र कर्मचारीबीच समन्वयकारी भूमिका निर्वाह गर्नु पर्ने भएको छ ।
