२८ फागुन २०८१, बुधवार
झापा, २७ फागुन । मेचीनगर नगरपालिका–४ नम्बरमा हात्ती भन्दा बढी बाँदरले आतंक मच्याउन थालेको स्थानीयवासीको गुनासो छ ।
स्थानीयवासीका अनुसार बाँदरले खेतबारीमा लगाएको अन्नबाली मात्र नभएर घरमै भण्डारण गरेको अन्न र पकाएर राखेको भात समेत खाइदिएर हैरान पारेको छ ।
कोरोना महामारीका समयमा वस्ती पसेका बाँदरले निरन्तर दुःख दिन थालेपछि स्थानीयवासी हैरान भएका हुन् । वडा नम्बर ४ की ४५ बर्षीया लीला बस्नेतले बाँदरको कारण बसाई सनुपर्ने अवस्था सिर्जना भएको बताउनुभयो ।
“बारीको त कुरा छाडौं न पकाएर राखेको भात पनि खान पाउन छाडियो”, उहाँले भन्नुभयो, “हात्तीले त दुःख दिएकै थियो अब बाँदरले पनि बसिखान दिएन । बसाई नै हिंड्नु पर्ने भइसक्यो ।” उहाँले पहिला पहिला मान्छे देख्ने वित्तिकै भाग्ने बाँदर आजकल महिला केटाकेटी मात्र देखे भने झम्टिएर आउने गरेको बताउनुभयो ।
बारीमा लगाएको मकै, गहुँ,केरा, सुपारीलगायतका मौसमी अन्नबाली र फलफूल सबैमा बाँदरले क्षति गर्दै आएको स्थानीय कुसुम गौतमले बताउनुभयो । स्थानीय क्षेत्रको चिया बगान, सामुदायिक वन र बाँसघारीलाई बासस्थान बनाएर बसेका बाँदर नखेद्ने हो भने बाँहुनडाँगीबासीले गाउँ छाडेर हिंड्नुको विकल्प नभएको उहाँको भनाई छ ।
मेचीनगर नगरपालिका–४ का वडाध्यक्ष अर्जुन कार्कीले विगत पाँच बर्षदेखि बाहुनडाँगी क्षेत्रमा बाँदरले दुःख दिँदै आएको बताउनुभयो । उहाँले हाल बाहुनडाँगीमा जंगली हात्तीको आतंक भन्दा बाँदर आतंक बढी भएको बताउनुभयो ।
“हात्तीले त खेतबारीको अन्नबाली मात्र खाइदिन्थ्यो”, उहाँले भन्नुभयो, “बाँदरले त चुलोमा पकाएर राखेको भात नै खाइदिँदोरहेछ । यसको नियन्त्रणमा बारे छलफल भइरहेको छ विधि पत्ता लगाउन सकेका छैनौं ।”
उहाँले किसानलाई थोरै भए पनि राहत उपलब्ध गराउने उद्देश्यले बन्यजन्तुबाट अन्नबालीमा पुर्याएको क्षतिको वडामा परेका निवेदनका आधारमा राहत दिँदै आएको बताउनुभयो । उहाँले किसानलाई राहत दिने उद्देश्यले नै निकट भविष्यमै बाहुनडाँगी बासीका सबै प्रकारका कृषि बालीहरुमा विमा गरिदिने सोच राखेको बताउनुभयो ।
