झापा, १९ चैत । शिवसताक्षी नगरपालिका वडा नं. १० को कार्यालय लगायत सार्वजनिक प्रयोजनमा रहेको जग्गा भूमाफियाले हात पारेपछि स्थानीय जनप्रतिनिधि र राजनीतिक दलहरु सरकारी जग्गाको संरक्षणमा जुटेका छन् ।

बिगत पाँच दशकदेखि कनकाई सिञ्चाई आयोजना झापाको भोगाधिकार रहेको ११ बिगाहा सात कठ्ठा जग्गामध्ये कित्ता नं. १८२ को चार बिगाहा जग्गामा वडा नं. १० को कार्यालय भवन, प्रहरी चौकी, कभर्ड हल र फुटबल मैदान रहेको छ ।

वडाध्यक्ष हर्क सिगुका अनुसार वि.सं. २०४६ जेठ २९ गते भूपाल किराती नेतृत्वमा गठित सुकुम्बासी समस्या समाधान आयोगबाट दमक वडा नं. ५ का केशरबहादुर खड्काले मिलेमतो गरेर उक्त चार बिगाहा जग्गा आफ्नो नाममा दर्ता गराएका थिए । तर, सरकारी स्वामित्वको उक्त जग्गामा खड्काले कहिल्यै भोगचलन गरेनन् ।

खड्काले सो जग्गा वि.सं. २०४७ असोज १ गते लोकमाया खतिवडा, वेदकुमारी बस्नेत र नइद्रप्रसाद भण्डारीलाई विक्री गरेका थिए । तीनै जना व्यक्ति हालसम्म जग्गाको भोगचलन गर्न नआएको वडाध्यक्ष सिगुले बताउनभयो । नगरपालिकाले सो जग्गाको विक्री रोक्का गरेको छ ।

“सरकारी स्वामित्वको जग्गा झुक्याएर हत्याएका भूमाफियाहरु अहिले आएर जग्गा फुकुवा गरिदिनु पर्यो भन्दै मालपोत कार्यालयमा पुगेको थाहा भयो,” वडाध्यक्ष सिगु भन्नुहुन्छ–“तर, हामी जनप्रतिनिधि र राजनीतिक दलहरु यो जग्गा भूमाफियाको चंगुलमा पर्न दिदैनौं ।”

शिवसताक्षी नगरपालिकाका पूर्व नगरप्रमुख चन्द्रकुमार शेर्माले २०४६ सालको तरल राजनीतिक परिस्थितिमा कर्मचारीहरुसँग मिलेर भूमाफियाले जग्गाको धनीपूर्जा निकालेको बताउनुभयो । उहाँले उक्त जग्गा सरकारी स्वामित्वमा फर्काउन आफ्नो नेतृत्वकालमा पहल गरिएको बताउनुभयो ।

नेपाली कांग्रेसका महाधिवेशन प्रधिनिधि पर्शुराम ढुंगानाले सरकारी जग्गा भूमाफियाबाट फर्काउन स्थानीय सवै राजनीतिक दल एकमत रहेको बताउनुभयो । प्रदेश सरकार र संघीय सरकारलाई पनि यस विषयमा ध्यानाकर्षण गराउनु पर्ने उहाँको भनाई छ ।

जग्गा फुकुवा गर्न लोकमाया खतिवडा, वेदकुमारी बस्नेत र नइद्रप्रसाद भण्डारीको तर्फबाट केही बिचौलियाहरु सक्रिय रहेको वडा सदस्य दिपक पोखरेलको दावी छ । उहाँले भन्नुभयो– “जसले जग्गाको स्वामित्व दावी गरिरहनु भएको छ, उहाँहरु यो नगरको बासिन्दा होइन । उहाँहरुलाई जग्गाको साँध सीमाना पनि थाहा छैन । भोगाधिकार पनि उहाँहरुको छैन । केही बिचौलियाहरु जग्गा फुकुवा गरेर कमाउने दाउमा लागिरहेका छन् ।”