२१ चैत २०८१, शुक्रवार
झापा, २१ चैत । सहयोगापेक्षी, सडक आश्रित र असहाय मानवहरुको स्थायी बसोबास र भरणपोषणका लागि मानव सेवा आश्रमले झापामा अक्षयकोष स्थापना गरेको छ ।
समाजसेवी निलकण्ठ तिवारीले अक्षयकोषका लागि आफ्ना स्वर्गीय आमावुवाको स्मृतिमा रु. एक लाख ११ हजार १११ प्रदान गरेर सहयोगको थालनी गर्नुभयो ।
सडकबाट उद्धार गरेर आश्रममा राखिएका व्यक्तिहरुको भरणपोषण र हेरचाहका लागि दीगो स्रोत जुटाउन रु. एक करोडको अक्षयकोष स्थापना गरिएको आश्रमका संयोजक खगेन्द्र विश्वकर्माले बताउनुभयो ।
अक्षयकोषमा जोकोही दाताहरुले रकम प्रदान गर्नसक्ने र कोषको व्याजबाट आश्रितहरुको दैनन्दिनको खर्च जुटाउन सहज हुने उहाँको भनाई छ ।
यो आश्रम मेचीनगर नगरपालिका वडा नं. ४ बाहुनडाँगी छ । स्थानीय रामबहादुर प्रधानले आश्रमका लागि दुई विगाहा पाँच कठ्ठा जमिन निःशुल्क प्रदान गर्नुभएको छ । प्रधानमन्त्री केपी शर्मा ओलीले गत मङ्सिरमा आश्रमको औपचारिक उद्घाटन गर्नु भएको थियो ।
अनौपचारिक रुपमा गत साउनदेखि नै आश्रममा सहयोगापेक्षी सडकआश्रित मानवहरुलाई आश्रय दिइँदै आएको थियो । आश्रमका हाल ४३ जना महिला र पुरुष बस्दै आउनु भएको छ । आश्रममा ७६ जना सहयोगापेक्षी सडकआश्रित मानवहरुको उद्धार गरेर ल्याइएकोमा २२ जनालाई उहाँहरुकै परिवारमा पुनर्मिलन गराइएको र पाँच जनाको देहान्त भएको संयोजक विश्वकर्माले जानकारी दिनुभयो ।
आश्रमले आफ्ना लागि आफै केही गर्न नसक्ने अवस्थामा रहेका, हेरचाह र पालनपोषण गरिदिने समेत कोही नभएका, सहयोगापेक्षी बेसहारा, असहाय, अशक्त, अभिभावकविहीन, मानसिक तथा शारीरिक रुपमा अति कमजोर र अनाथ मानवहरूको उद्धार गरी आश्रय दिँदै आएको छ ।
वि.संं. २०६९ सालमा हेटौँडामा औपचारिक रूपमा मानव सेवा आश्रमको स्थापना गरी आश्रमले मानवता प्रवर्धनको अभियान चलाउँदै आइरहेको छ । आश्रमले नेपाललाई सडक मानवमुक्त बनाउने गरी उद्धार तथा आश्रय प्रदान र्ने देशब्यापी अभियान सञ्चालन गर्दै आएको छ ।
