२१ चैत २०८१, शुक्रवार
मेचीनगर, २१ चैत । मेचे समुदायले महान पर्व ‘बैशाखु बथर’को अवसरमा विदा हुनुपर्ने माग गरेको छ ।
मेचे समाज शिवियारी अफातले हालै मेचीनगर नगरपालिकाका नगरप्रमुख गोपाल बुढाथोकीलाई ज्ञापन पत्र बुझाउँदै बैशाख ३ गते सार्वजनिक विदा हुनुपर्ने माग गरेको हो ।
शिवियारी अफातका मेचीनगर अध्यक्ष देशभक्त मेचेको नेतृत्वमा रहेको संस्थाको प्रतिनिधिमण्डलले नगरप्रमुख बुढाथोकीलाई ज्ञापनपत्र बुझाउँदै पर्वको बारेमा समेत जानकारी गराएको थियो ।
ज्ञापन पत्र बुझ्दै नगरप्रमुख बुढाथोकीले यस विषयलाई कार्यपालिका बैठकमा लैजाने प्रतिवद्धता व्यक्त गर्नुभएको थियो ।
प्रतिनिधिमण्डलमा अफातका सचिव बिक्रम मेचे, केन्द्रीय सदस्य अमर मेचे, पूर्व केन्द्रीय अध्यक्ष रोनलाल मेचे, पूर्व उपाध्यक्ष सन्तोष मेचे, पूर्व सांस्कृतिक विभाग प्रमुख पवन मेचे लगायत हुनुहुन्थ्यो ।
मेचे समुदायले ‘बैशाखु बथर’ लाई नयाँ वर्षको उत्सवको रुपमा बैशाख महिनाभरि मनाउने गरेका छन् । नयाँ वर्षको स्वागतमा जातीय पहिरनमा सजिएर समुदायले बाजा गाजासहित शुभकामना आदानप्रदान, खानपिन र नाचगान गर्ने चलन रहेको छ ।
सरकारले मेचे समुदायलाई लोपोन्मूख तथा सिमान्तकृत समुदायमा सूचीकृत गरेको छ । वि.सं. २०७८ को जनगणना अनुसार देशभरि मेचे समुदायको जनसंख्या पाँच हजार १९३ जना रहेको छ ।
झापामा बसोबास गर्ने यो समुदायको मेचीनगर र हल्दिबारीमा सघन बस्ती रहेको छ ।
