२२ चैत २०८१, शनिवार
झापा, २२ चैत । खाद्य प्रविधि तथा गुण नियन्त्रण डिभिजन कार्यालय झापाले मेचीनगर–१० धुलाबारीस्थित एक किराना पसलबाट संकलन गरेको चामलको नमुना जाँच गर्दा अखाद्य वस्तु नभेटिएको रिपोर्ट दिएको छ ।
मेचीनगर–१० का नजरलाल राजबंशीले उक्त किराना पसलबाट किनेर लगेको चामलमा अखाद्य बस्तु मिसावट भएको दावी गर्दै चैत ३ गते इलाका प्रहरी कार्यालय धुलाबारीमा उजुरी दिनु भएको थियो ।
उक्त उजुरीका आधारमा प्रहरीले थप कार्वाही अघि बढाइदिन खाद्य प्रविधि तथा गुण नियन्त्रण डिभिजन कार्यालय झापालाई पत्राचार नै गरेको थियो ।
पत्राचारपछि कार्यालयका खाद्य निरीक्षण अधिकृत सागरराज पोखरेलले धुलाबारीको किराना पसलमा आएर जाँचका लागि चामलको सिलबन्दी नमुना लिएर जानु भएको थियो ।
उक्त नमुना विराटनगरस्थित प्रादेशिक खाद्य प्रयोगशालामा जाँचिएको थियो । प्रयोगशाला जाँचबाट उक्त चामलमा अखाद्य वस्तु मिसावट नभएको र नेपाल सरकारले तोकेको अनिवार्य गुणस्तर अनुरुप अनुकूल पाइएको रिपोर्ट आएको छ ।
मिसावट नभएको रिपोर्ट आएपछि आज मेची उद्योग वाणिज्य संघमा चामलको उत्पादन गर्ने मेचीनगर–७ इटाभट्टास्थित राधाकृष्ण इन्डस्ट्रिजका सञ्चालक अरुण साह र संघका पदाधिकारीले पत्रकार सम्मेलन गरेर रिपोर्ट बारे जानकारी दिनु भएको छ ।
उक्त उद्योगले उत्पादन गरेको उज्यालो ब्रान्डको मन्सुली चामलमा मिसावटको दावी गर्दै उजुरी परेको थियो । उजुरीकर्ताले चामलमा प्लास्टिक जस्तो त्यान्द्राहरु मिसावट भएको दावी गरेका थिए ।
डिभिजन कार्यालयले जाँचको रिपोर्ट आइसकेकाले उक्त ब्रान्डको चामलको विक्री वितरण खुला गरिएको जनाएको छ ।
