झापा, १४ भदौ । कोशी प्रदेशका मुख्यमन्त्री हिक्मत कुमार कार्कीले अलैंचीको उत्पादकत्व बृद्धि र व्यवसाय प्रवद्र्धनमा सहयोग गर्ने बताउनुभएको छ ।
आज नेपाल अलैंची व्यवसायी महासंघको विर्तामोडमा आयोजित पाँचौ महाधिवेशन तथा नवौ औं साधारणसभालाई सम्बोधन गर्दै मुख्यमन्त्री कार्कीले अलैंचीको नर्सरीदेखि बजार प्रवद्र्धनमा सरकारले सहयोग गर्ने बताउनुभएको हो । उहाँले अलैंचीको उत्पादन र निकासी बढाउन नीतिगत रुपमा प्रदेश सरकारले निर्णय गरी स्रोत साधान उपलब्ध गराउने प्रतिवद्धता समेत व्यक्त गर्नुभएको छ ।
मुख्यमन्त्री कार्कीले साना तथा मझौला व्यवसायको प्रवद्र्धन र उद्यमशीलताको विकासको लागि स्वीस सरकारसँगको सहयोगमा प्रदेश सरकारले ‘उदय’ परियोजना सुरु गरेको बताउँदै भन्नुभयो, “रु.तीस लाखदेखि तीन करोडसम्म साना तथा मझौला उद्योगमा लगानी गर्दैछौं । अलैंची किसानलाई अघि सरारेर आउनुहोस् ।”
उहाँले अलैंची, चिया, बाँस दुग्ध पदार्थलगायतका क्षेत्रमा उत्पादन र बजार बढाएमा कोशी प्रदेश समृद्धि यात्रामा तीब्र गतिमा अघि बढ्ने धारणा व्यक्त गर्नुभयो । उहाँले चियाको कार्यालय पनि काठमाडौंबाट उत्पादन क्षेत्रमा आउनु पर्ने धारणा व्यक्त गर्नुभयो ।
संस्थाका अध्यक्ष निर्मला भट्राईले वि.सं. १८३० मा सिक्किमबाट अलैंची नेपाल भित्रिएको बताउनुभयो । उहाँले बार्षिक रु.सातदेखि रु.१० अर्बको अलैंची नेपालबाट निर्यात भइरहेको जानकारी दिनुभयो । अध्यक्ष भट्टराईले भोजपुर र संखुवासभालाई समेटेर अलैंची सुपरजोन स्थापना गर्न सरकारलाई आग्रह गर्नुभयो ।
महाधिवेशनमा १६ जिल्लाका प्रतिनिधिहरुको उपस्थित रहेको छ । कार्यक्रममा उत्कृष्ट अलैंची निर्यातकर्ता, उत्कृष्ट किसान र कर्मचारीलाई पुरस्कृत गरिएको छ । सम्मानित हुनेहरुमा उत्कृष्ट किसान ताप्लेजुङ्गका विदुर तिवारी, स्व. देवीप्रसाद उत्कृष्ट व्यवसायी सम्मानबाट विर्तामोड निवासी रोशनलाल अग्रवाल, उत्कृष्ट निर्यातकर्ता ओमकृष्ण विमली र उत्कृष्ट कर्मचारीको रुपमा अनिल ढुंगाना, रीमा श्रेष्ठ हुनुहुन्छ ।
