९ मंसिर २०८१, आइतवार
झापा, २१ पुस । विश्व बैंकको सहयोगमा ‘सहरी शासकीय सुधार तथा पूर्वाधार आयोजना’ अन्तर्गत मेचीनगरको सहिद मार्ग र सूर्योदय मार्गमा १४ किलोमिटर कालोपत्रे सडक निर्माण हुने भएको छ ।
नगरको दुई महत्वपूर्ण सहरी क्षेत्र धुलाबारी र काँकडभिट्टाको विकासमा टेवा पुग्ने उक्त सडकमा विश्व बैंकको रु. एक अर्ब तीन करोड लगानी हुने प्रतिनिधिसभा सदस्य विश्वप्रकाश शर्माले बताउनुभयो ।
सात प्रदेशको ३३ वटा स्थानीय तहमा ‘सहरी शासकीय सुधार तथा पूर्वाधार आयोजना’ सञ्चालन गर्ने नेपाल सरकारले निर्णय गरिसकेको छ । उक्त आयोजनामा नेपाल सरकारलाई विश्व बैंकले एक अर्ब ५० करोड अमेरिकी डलर (रु. दुई खर्ब) आर्थिक सहयोग गर्ने सम्झौता भएको थियो ।
उक्त परियोजना अन्तर्गत झापा निर्वाचन क्षेत्र नं. १ को मेचीनगरमा दुई वटा सडक कालोपत्रे गर्न विश्व बैंकले ७८ लाख अमेरिकी डलर (रु. एक अर्ब तीन करोड) सहयोग दिएको नेपाली कांग्रेसका महामन्त्री तथा झापा–१ का प्रतिनिधिसभा सदस्य शर्माले बताउनुभयो ।
उहाँका अनुसार सहिदमार्ग अन्तर्गत धुलाबारी मोडदेखि बजार क्षेत्र हुँदै खुट्टिडाँगीको थोप्लेबिरान सामुदायिक बनको कार्यालयसम्म ५.३ किलोमिटर कालोपत्रे निर्माण हुनेछ । उक्त सडकको चौडाई १२ मिटर, ड्रेन र डबल लेन रहने उहाँले जानकारी दिनुभयो ।
यसैगरी, सूर्योदय मार्ग अन्तर्गत पूर्वीनाकाको काँकडभिट्टास्थित भट्टराई चोकबाट सुरु भएर बाहुनडाँगी बजारसम्मको ८.५ किलोमिटर लामो सडक कालोपत्रे, डबल लेन र ११ मिटर चौडाइको रहने शर्माले बताउनुभयो ।
संघीय सरकारको निर्णय र स्थानीय तहको नेतृत्वमा ती सडक निर्माण हुने भएका छन् । विशव बैंकसँगको सम्झौतामा ती दुबै सडक २०८२ असार ३१ गतेसम्ममा निर्माण सम्पन्न भइसक्नु पर्ने उल्लेख छ ।
