झापा, २५ चैत । वैदेशिक रोजगारीका लागि कुवेत जानु भएकी मेचीनगर–८ की २८ वर्षीया सपना ठटालले आफूलाई रोजगारदाताले बन्धक बनाएर श्रम शोषण गरिरहेको जनाउँदै उद्धारका लागि आग्रह गर्नु भएको छ ।

काठमाडौंका नारायण थापा नामका एजेन्टले अल्फा नामक मेनपावर कम्पनीमार्फत मासिक रु. ४० हजार पारिश्रमिक हुने प्रलोभन देखाएर सात महिना अघि कुवेत पुर्याएको सपनाका पति श्यामबहादुर ठटालले बताउनुभयो ।

मध्य कुवेतबाट ३२ किलोमिटर पश्चिमस्थित अल जहार सहरमा घरेलु कामदारको रुपमा पुर्याइएकी सपनाले दश दिन अघि साथीको मोबाइलमार्फत पतिसँग सम्पर्क गरी आफ्नो नाजुक अवस्थाबारे जानकारी गराउँदै जतिसक्दो छिटो उद्धार गरिदिन आग्रह गर्नु भएको हो । 

“कुवेत गएको चार महिनादेखि सम्पर्कविहीन अवस्था थियो,” सपनाका पति श्यामबहादुर ठटालले भन्नुभयो–“दश दिन अघि एक्कासी फोन आयो । साथीको फोनबाट लुकेर सम्पर्क गरेको बताएकी थिइन् । बिना पैसा रातोदिन काम लगाउने गरेको र केही बोल्यो भने उल्टै साहुनीले कोठामा थुनेर कुटपिट गर्ने गरेको बताउँदै जतिसक्दो छिटो उद्धार गरिदिनु भनेर भनिन् ।”

सपना जस्तै थुप्रै महिलालाई कोठामा थुनेर राख्ने गरेको र कामका लागि गाडीमा हालेर टाढासम्म पुर्याउने गरेको सपनाका पति श्यामबहादुरले पत्नीको भनाई उद्धृत गर्दै बताउनुभयो । मोबाइल खोसेर परिवार र साथीसँग सम्पर्कविहीन बनाएर श्रम शोषण गरिरहेको उहाँले जानकारी दिनुभयो । 

कुवेत गएपछि एकपटक रु. ४० हजार पठाएको र त्यसपछि सम्पर्क टुटेको सपनाकी आमा कृष्णमाया परियारले बताउनुभयो । नाताले भाउजु पर्ने पुष्पा दर्जीमार्फत एजेन्ट नारायण थापासँग सम्पर्क भएको र पुष्पा पनि हाल कुवेतमै रहेको कृष्णमायाले बताउनुभयो ।

काठमाडौं घर बताउने एजेन्ट नारायण थापाले पीडितलाई उद्धार गरेर नेपाल ल्याउन रु. नौ लाख फिरौती रकम मागेको कृष्णमायाले बताउनुभयो । “नौ लाख रुपैयाँ दिनु, म सपनालाई झिकाइदिन्छु भनेर नारायण थापाले भन्नुभयो”, कृष्णमायाले भन्नुभयो–“पुष्पा दर्जीलाई सम्पर्क गर्दा उहाँले पनि केही मदत गर्न नसक्ने बताउनुभयो ।”

दैनिक ज्यालादारी गरेर पेटपालन गर्दै आएको आफ्नो परिवारसँग फिरौति रकम बुझाउने कुनै सम्भावना नरहेको उहाँले गुनासो सुनाउनुभएको छ ।

बैदेशिक रोजगारीमा जान सपना ठटालले बनाएको कागजात अनुसार उहाँको वि.सं. २०८० भदौ १८ गते कुवेतको भिसा जारी भएको छ भने त्यसको बैधता चार महिना अर्थात वि.संं २०८० पुस १८ गतेसम्म मात्र भएको पाइएको छ ।

सपनाको भिसा कागजात अनुसार उहाँलाई घरेलु कामदारको रुपमा कुवेतको मोदार रियल इस्टेटमा लगेको देखिन्छ । त्यहाँको ठेगाना अल जहरा ब्लक–८, सडक–१६० भएको पनि कागजातमा उल्लेख छ ।

छोटो अवधिको भिसा बनाएर विदेशमा लैजाने र भिसाको म्याद गुज्रिएपछि अबैध रुपमा काम लगाएर श्रम शोषण गर्ने गिरोहको फन्दामा पीडित महिला परेको हुनसक्ने आशंका छ । विदेश लैजाँदा लागेको सबै खर्च एजेन्ट नारायण थापाले नै व्यहोरेको बताइएको छ ।

कुवेतमा बन्धक जस्तै अवस्था भोगिरहनु भएकी सपनाको घरमा दुई छोरा छन् । सानो छोरा १४ महिनाको छ । उहाँका पति श्यामबहादुर ठटाल ट्याक्टरमा बेल्चा हान्ने मजदुरी काम गर्दै आउनु भएको छ । आमा कृष्णमायाले छोरीको सकुशल उद्धार गरी नेपाल ल्याइदिन नेपाल सरकारसँग अनुरोध गर्नु भएको छ ।