६ पुष २०८१, शनिवार
मेचीनगर, १० असार । मेचीनगर नगरपालिकाले विपन्न समुदाय उपभोक्तालाई पाँच युनिट खानेपानी निःशुल्क उपलब्ध गराउने भएको छ ।
नगरकी उपप्रमुख मीना उप्रेतीले आज नगरको सभामा नीति तथा कार्यक्रम प्रस्तुत गर्दै उक्त घोषणा गर्नु भएको हो ।
उहाँले खानेपानी उपभोक्ता संस्थासँग समन्वय गरेर नगरबासीलाई उक्त सुविधा उपलब्ध गराइने बताउनुभयो ।
नगरपालिकाको आव २०८१/०८२ को नीति तथा कार्यक्रम सभामा आज प्रस्तुत भएको छ ।
उप्रेतीले प्रस्तुत गर्नु भएको नीति तथा कार्यक्रममा यसपटक थुप्रै नयाँ र लोकप्रिय हुनसक्ने कार्यक्रमहरु उल्लेख छन् ।
हाँसेर सेवा
नगरपालिकाका कर्मचारीले नगरबासीलाई हाँसेर सेवा दिने भएका छन् । ‘रहरले काम गरौं, हाँसेर सेवा गरौं’ भन्ने नीतिगत नारा नै नगरले ल्याएको छ ।
डिजिटल बडापत्र
नगरका १५ वटै वडा कार्यालय र मुख्य प्रशासनिक कार्यालय इटाभट्टामा अब डिजिटल नागरिक बडापत्र राखिने भएको छ ।
हाल कुनै पनि वडामा नागरिक बडापत्र राखिएका थिएनन् । नगरबासीलाई प्रदान गरिने सेवा तथा सुविधा कति समयमा कुन फाँटबाट कुन कुन कागजातका आधारमा उपलब्ध गराइन्छ भनेर जानकारी दिइने सूचना पाटी नै नागरिक बडापत्र हो ।
चेक भुक्तानीको झञ्झट सकियो
अहिलेसम्म नगरपालिकामा भुक्तानी लिन जाँदा बढी भीडभाड र कर्मचारीसँग सेवाग्राहीको विवाद भइरहेको देखिन्छ ।
त्यसको एउटा कारण हो–भुक्तानीमा ढिलासुस्ती । चेकमार्फत भुक्तानी गरिने प्रणाली रहेका कारण सेवाग्राही चेक प्राप्त नगरेसम्म कार्यालयको विभिन्न फाँटमा धाइरहनु पर्ने बाध्यता अहिलेसम्म छ ।
तर, चेकको साटो डिजिटल भुक्तानीको नयाँ व्यवस्था नगरपालिकाले गर्ने भएको छ । जसलाई यसपालीको नीति तथा कार्यक्रममा जोड दिइएको छ ।
यसलाई इलेक्ट्रोनिक फन्ड ट्रान्सफर (इएफटी) प्रणाली भनिन्छ । मेचीनगरमा यसै वर्षदेखि इएफटी सिस्टम लागू गरिने उपप्रमुख उप्रेतीले बताउनु भयो ।
यो प्रणाली लागू भएपछि कुनै पनि योजना तथा बिलको भुक्तानी सेवाग्राहीको बैंक खातामा डिजिटल माध्यमबाट भुक्तानी हुनेछ ।
तीन पटक सार्वजनिक सुनुवाई
यस वर्षदेखि नगरपालिकाले चौमासिक रुपमा सार्वजनिक सुनुवाई कार्यक्रम गर्ने भएको छ ।
पाँच लाखमाथिका योजना ठेक्काबाट
नगरपालिकाले ५ लाख रुपैयाँभन्दा माथिका विकास निर्माणका योजनाहरु ठेक्का प्रक्रियाबाट निर्माण गरिने भएको छ ।
किसान सूचीकृत
नगरका कृषकहरुलाई नगरपालिकाले सूचीकृत गर्ने नीति लिएको छ ।
सडक बत्ती टोललाई
नगरपालिकाले टोल विकास समितिहरुलाई टोलको सडकको बत्ती हस्तान्तरण गर्ने भएको छ ।
विपन्नलाई घर र छाना
प्रकोप पीडित परिवारका २० वटा आवास गृह यस वर्ष नगरपालिकाले बनाइदिने नीति बनाएको छ । त्यस्तै, विपन्न समुदायको १०० घरमा जस्ता पाताको छानो लगाइदिने भएको छ ।
धुलावारीमा अस्पताल
धुलाबारी स्वास्थ्य केन्द्रलाई १५ शैयाको अस्पताल बनाएर विशेषज्ञ डाक्टर, डिजिटल एक्स रे र आधुनिक प्रयोगशालासहितको स्वास्थ्य सुविधा उपलब्ध गराउने नीति नगरपालिकाले लिएको छ ।
