झापा, २१ पुस । नेपाली कांग्रेसका महामन्त्री विश्वप्रकाश शर्माले जनताको लोकप्रिय मत प्राप्त गर्ने राजनीतिक दलबाटै चुनिएको पाँच वर्ष टिक्ने प्रधानमन्त्री संविधान संशोधनको अबको प्राथमिकता रहेको बताउनु भएको छ ।
नेपाली कांग्रेस झापा क्षेत्र नं. १ ले आज गृहनगर मेचीनगरमा आयोजना गरेको क्षेत्रीय भेलामा बोल्दै उहाँले संविधान संशोधन गर्दा पार्टीले प्रधानमन्त्री वा राष्ट्रपति पद प्रत्यक्ष मतद्वारा निर्वाचित हुने व्यवस्था प्रस्ताव नगर्ने स्पष्ट पार्नुभयो ।
मुलुकमा राणा शासनपछि लगातार पाँच वर्ष कुनै पनि प्रधानमन्त्री नटिकेको चर्चा गर्दै मुलुकको कार्यकारी प्रमुख प्रत्यक्ष निर्वाचित हुने व्यवस्था नेपालमा आवश्यक नरहेको बताउनुभयो ।
“प्रधानमन्त्री पाँच वर्ष टिक्ने हुनुपर्यो भनिरहँदा,” महामन्त्री शर्माले आफ्नो प्रस्ताव सुनाउँदै भन्नुभयो–“जुन दल पपुलर मत र प्रत्यक्ष सिटतर्फ पहिलो हुन्छ, त्यही दलको संसदीय दलले छानेको नेता कार्यकारी प्रधानमन्त्री हुने व्यवस्था संविधान संशोधनमा उल्लेख हुनुपर्छ ।”
लोकिप्रय मतमा पहिलो हुने दल सत्तामा र दोस्रो हुने दल प्रमुख प्रतिपक्षमा हुने भनेर संविधानमै उल्लेख हुनुपर्ने र सत्तामा पुग्ने दलको संसदीय दलबाट प्रधानमन्त्रीले दुई वर्षमा विश्वासको मत जित्ने व्यवस्था गरिनु पर्ने उहाँको धारणा थियो ।
सत्तारुढ दलहरु नेपाली कांग्रेस र नेकपा एमाले संविधान संशोधन गर्न सहमत भएरै सत्ता समीकरण बनेको उल्लेख गर्दै उहाँले एक पटक राष्ट्रपति र दुई पटक मात्र प्रधानमन्त्री बन्न पाउने संबैधानिक व्यवस्था हुनुपर्ने प्रस्ताव गर्नुभएको छ ।
उहाँले नेपाली कांग्रेसको महाधिवेशन ०८४ को आम निर्वाचनभन्दा एक वर्ष अघि हुने र अहिले कांग्रेस महाधिवेशनको दिशामा गइसकेको बताउनुभयो ।
चौरासीको चुनावमा नेपाली कांग्रेस एक्लै चुनावमा होमिने बताउँदै उहाँले भन्नुभयो–“म यति चाहिँ ढुक्कले भन्न सक्छु कि चौरासीको चुनावमा नेपाली कांग्रेसका मतदाताले रुखबाहेक अरु चुनाव चिह्नमा भोट हाल्नु पर्दैन ।”
