झापा, १६ माघ । प्रतिनिधिसभाका सभामुख देवराज घिमिरेले सहिदको बलिदानका कारण मुलुकमा स्वास्थ्य, शिक्षा लगायतका क्षेत्रमा उज्यालो युग आएको बताउनु भएको छ । 

उहाँले स्वास्थ्य उपचारको क्षेत्रमा नागरिकले पाइरहेको सुविधा सहिदको बलिदानबाट प्राप्त लोकतान्त्रिक शासन व्यवस्थाको प्रतिफल भएको धारणा व्यक्त गर्नु भयो ।

अमेरिकी दातृ संस्था ‘हेल्पिङ हेन्ड फर रिलिफ डेभलेपमेन्ट’ले विर्तामोड नगर अस्पताललाई सहिद दिवसको अवसर पारेर आज प्रदान गरेको चिकित्सा सामग्री हस्तान्तरण कार्यक्रमलाई सम्बोधन गर्दै सभामुख घिमिरेले स्वास्थ्य क्षेत्रमा ठूलो उपलब्धि भएको बताउनुभयो । 

“वि.सं. २०४० तिर विर्तामोडमा उपचार गर्ने ठाउँ नभएर मानिसहरु भारतको सिलिगुढी जान बाध्य थिए,” अहिले झापा स्वास्थ्य क्षेत्रको हब बनिरहेको उदाहरण दिदै उहाँले भन्नुभयो–“अहिले आँखा र क्यान्सरको उपचार गर्न भारतबाट मानिसहरु विर्तामोड आउने गरेका छन् ।”

राणा शासन र पञ्चायती व्यवस्थामा जनताले स्वास्थ्य, शिक्षा लगायतका क्षेत्रमा अँध्यारो युग व्यहोर्नु परेको उल्लेख गर्दै सभामुख घिमिरेले नागरिकले स्वतन्त्रतापूर्वक जिउन पाउने अधिकारका लागि बलिदान दिने सहिदहरुको योगदानलाई कहिल्यै भुल्न नहुने बताउनुभयो ।

उहाँले स्वास्थ्य बिमामार्फत हुने उपचारलाई अझ व्यवस्थित र भरपर्दो तुल्याउनुपर्ने आवश्यकता औंल्याउँदै निःशुल्क उपचार दिदै आएका सरकारी अस्पतालहरुलाई निजी क्षेत्रका अस्पतालसँग प्रतिष्पर्धा गर्नसक्ने सुविधासम्पन्न बनाउन राज्यले भरपुर सहयोग दिनु पर्ने सुझाव राख्नु भयो ।

दुई करोडको अस्पताल सामग्री सहयोग

अमेरिकी दातृ संस्था ‘हेल्पिङ हेन्ड फर रिलिफ डेभलेपमेन्ट’ले झापाका चार वटा सरकारी स्वास्थ्य संस्थालाई रु. दुई करोड मूल्यका चिकित्सा सामग्री सहयोग गरेको छ ।

विर्तामोड नगर अस्पताल र खुदुनावारी स्वास्थ्य केन्द्रलाई प्रदान गरिएको सामग्री सभामुख घिमिरेको उपस्थितिमा आज दातृ संस्थाले हस्तान्तरण गरेको हो ।

‘हेल्पिङ हेन्ड फर रिलिफ डेभलेपमेन्ट’का नेपाल संयोजक जीवप्रसाद पोखरेलले सभामुख घिमिरेको पहलमा विर्तामोड नगर अस्पताललाई रु. ७० लाख मूल्य बराबरको चिकित्सा सामग्री आज हस्तान्तरण गरिएको बताउनुभयो । 

आजै अर्जुनधाराको खुदुनावारी स्वास्थ्य केन्द्रलाई रु. २७ लाख मूल्य बराबरको चिकित्सा सामग्री सभामुख घिमिरेकै उपस्थितिमा हस्तान्तरण गरिएको छ । झापा गाउँपालिकाको आधारभूत अस्पताल र कमल गाउँपालिकास्थित आयूर्वेद अस्पताललाई मंगलवार ‘हेल्पिङ हेन्ड फर रिलिफ डेभलेपमेन्ट’ले चिकित्सा सामग्री प्रदान गरिसकेको छ ।

‘हेल्पिङ हेन्ड फर रिलिफ डेभलेपमेन्ट’ स्वास्थ्य र शिक्षाको क्षेत्रमा वि.सं. २०७२ सालको महाभूकम्पपछि राहत तथा विकास सहयोग प्रदान गर्दै आएको अमेरिकी दातृ संस्था हो । यसले ‘वर्क फर नेपाल’ नामक गैरसरकारी संस्थामार्फत सो दातृ संस्थाको सहयोग वितरणको व्यवस्थापनको कार्य गर्दै आएको संस्थाका अध्यक्ष तिलचन्द्र अधिकारीले बताउनुभयो । 

विर्तामोड नगरपालिकाकी नगरप्रमुख पवित्रा महतरा प्रसाईले इसीजी, शल्यक्रिया, ओपीडी, बर्थिङ लगायतका कार्यमा प्रयोग हुने १३६ प्रकारका महत्त्वपूर्ण चिकित्सा सामग्री आज प्राप्त भएको बताउनुभयो ।