झापा, १७ माघ । शिवसताक्षीस्थित राष्ट्रिय रमणीय आदर्श माध्यमिक विद्यालयले ५५ औं वार्षिकोत्सव अवसरमा उत्कृष्ट शिक्षक तथा कर्मचारीलाई सम्मान गरेको छ । 

विद्यालयमा एक वर्ष भित्रमा उत्कृष्ट काम गर्ने पाँच शिक्षक र एक कर्मचारीलाई आज सम्मान गरेको हो ।

विद्यालयले शिक्षक युवराज आङदेम्बे, अरुण रेग्मी, मोनिका मोक्तान, अस्मिता राई, लीला गेलाल र कर्मचारी छविलाल दवाडीलाई सम्मान गरेको हो । 

उनीहरुलाई संघीय सांसद लालप्रसाद साँवा, शिवसताक्षी नगरपालिकाका नगरप्रमुख मेगाहाङ्ग थोप्रालगायतले सम्मान पत्र प्रदान गर्नु भएको हो । 

कार्यक्रममा बोल्दै सासद साँवाले यस विद्यालय आफुले पनि अध्ययन गरेको र धेरै जनप्रतिनिधिहरुले अध्ययन गरेको विद्यालय भएको बताउनु भयो । 

विद्यालयको वार्षिकोत्सवकै अवसर पारेर विभिन्न व्यक्ति तथा संस्थाहरुले उक्त विद्यालयमा अध्ययन गर्ने विद्यार्थीहरुलाई छात्र बृत्ति प्रदान गरेका छन् । 

उमा उर्मिला छात्रवृत्ति अक्षयकोषबाट रु. आठ हजार ६०० एसईईमा उत्कृष्ट प्राप्त गर्ने प्रज्वल मैनाली र हिमाली काफ्लेलाई प्रदान गरिएको छ । 

त्यस्तै काठमाडौ खेवाङ्ग हातेमालो समाज छात्रवृत्ति वितरण कार्यक्रम अन्तर्गत कक्षा १२ मा उत्कृष्ट ग्रेड हासिल गर्ने निर्मला पराजुली र प्रभा राईलाई रु. २५÷२५ हजार प्रदान गरिएको छ । 

जयनारायण अयोध्यादेवी खनाल छात्रवृत्ति वितरणमा गरिब तथा जेहेन्दार विद्यार्थीको रुपमा अभिषेक राई र बविता लिम्बुलाई रु. ६÷६ हजार प्रदान गरिएको विद्यालयले जनाएको छ । 

त्यस्तै हरिप्रसाद हरिमाया रिजाल अक्षयकोष छात्रवृत्ति वितरणमा अरुण विक र देउकुमारी खड्कालाई रु. ५÷५ हजार वितरण गरिएको थियो । मनमाया माङ्धुम्बो थेवे स्मृति छात्रवृत्ति वितरण अन्तर्गत २०८० सालको कक्षा ८ बाट उत्कृष्ट जिपिए ल्याउने ओत्साङ्ग लिम्बु र कक्षा ९ बाट उत्कृष्ट जिपिए ल्याउने खुशी लिम्बुलाई रु. ६÷६ हजार प्रदान गरिएको छ । 

सिंहधन राधिका राई अक्षयकोष छात्रवृत्ति वितरणमा विद्यार्थी एरोन चौधरी, भुमिका धिमाल र रिमा गुरुङ्गलाई वितरण गरिएको विद्यालयका शिक्षक गोविन्द काफ्लेले जानकारी दिनुभयो । 

कार्यक्रममा सतासीधाम जेसीज वर्ष २०२४ का अध्यक्ष पदमजंग कुँवरले विद्यालयमा करिब तथा जेहेन्दर विद्यार्थीको अभिभावकत्व ग्रहण गर्दै विद्यार्थी संयोक श्रेष्ठलाई रु. १० हजार प्रदान गर्नु भएको छ ।  

कार्यक्रममा शिवसताक्षी नगरप्रमुख मेगाहाङ्ग थोप्रा, कोशी प्रदेश पूर्व कृषि मन्त्री झलकसिं दर्लामी, शिवसताक्षी नगरपालिका वडा नं. ८ वडाध्यक्ष सन्त फेउदिन लगायतले शुभकामना मन्तव्य राख्नु भएको थियो ।