२२ चैत २०८१, शनिवार
झापा, २ फागुन । मेचीनगरको एमिटी पब्लिक स्कुल (माध्यमिक तह)का विद्यार्थीहरुले आज अध्ययन तथा अनुसन्धान परियोजना अन्तर्गत मेची नदीको पानीको गुणस्तर परीक्षण गरेका छन् ।
पानीको गुणस्तर जाँच, बादलको पहिचान, बनस्पतिहरुको अध्ययन र सिमसारको अवलोकनका लागि प्रकृति बाल क्लवमा आवद्ध विद्यार्थीको समूह आज दिउँसो मेची नदी पुगेको स्कुलका प्रिन्सिपल सुवर्ण भट्टराईले बताउनुभयो ।
उहाँका अनुसार कक्षा १० का जेनिस भट्टराई र प्रनिशा लामाको नेतृत्वमा १७ जना विद्यार्थी अनुसन्धान भ्रमणमा गएका थिए । उनीहरुले एक घण्टा अनुसन्धान अवलोकनमा मेची नदीमा बिताएको उहाँले जानकारी दिनुभयो ।
अनुसन्धानमा आधारित भएर विद्यार्थीहरुको सिकाईलाई प्रभावकारी बनाउन एमिटी पब्लिक स्कुलमा २०७७ सालदेखि विद्यालय, विद्यार्थी, वातावरण शिविर (एक्का) नामक संस्थासँगको सहकार्यमा द ग्लोब कार्यक्रम सञ्चालन हुँदै आएको छ ।
विद्यार्थीहरुले आज स्थलगत अवलोकन र अनुसन्धानमा प्राप्त गरेको नतिजालाई द ग्लोब कार्यक्रमको डिजिटल एप्लिकेसनमा राखेपछि नासाका वैज्ञानिकहरुले त्यसको विश्लेषण गर्ने प्रिन्सिपल तथा द ग्लोब कार्यक्रमका अनुसन्धान शिक्षक भट्टराईले बताउनुभयो ।
“हाम्रा विद्यार्थीहरु वैज्ञानिक शिक्षाको अभ्यास गरिरहेका छन्,” उहाँले भन्नुभयो –“हरेक साताको शुक्रवार प्रकृति बाल क्लवका विद्यार्थी अनुसन्धानको नियमित भ्रमणमा जान्छन् । घुमेर आएपछि त्यसको रिपोर्ट एपमा हाल्छन् ।”
आज मेची नदी र नजिकको सिमसारको पानीको नमुना विद्यार्थीहरुले संकलन गरेको जनाउँदै त्यसमा मानव स्वास्थ्यका लागि हानिकारक कोलिफर्म, अम्लियपना, तापक्रम परिवर्तन र कन्डाक्टिबिलिटी आदिको अवस्था के कस्तो छ भनेर वैज्ञानिक परीक्षण विद्यार्थीहरुबाटै हुने उहाँले बताउनुभयो ।
