झापा, १३ फागुन । अर्जुनधारा जलेश्वरधाममा कोशी प्रदेशका २५ जोडीको दाइजोमुक्त सामूहिक विवाह गरिने भएको छ ।
धामले प्रदेशका १४ वटै जिल्लाका १३७ वटा पालिकामा सामूहिक विवाह गर्न इच्छुक विपन्न परिवारका जोडीको सिफारिस गरिदिन पत्राचार गरेको धाम समितिका कोषाध्यक्ष मनोज जोशीले बताउनुभयो ।
विश्व हिन्दू परिषद् नेपालसँगको सहकार्यमा अर्जुनधारा नगरपालिका वडा नं. ७ स्थित धामको मन्दिर परिसरमा सामूहिक विवाह उत्सवको आयोजना गरिएको हो । उहाँका अनुसार नयाँ बर्ष २०८२ को बैशाख ३ गते विवाहको मिति निर्धारण गरिएको छ ।
वडा कार्यालयले कानून बमोजिम उमेर पुगेको सिफारिस गरेका आधारमा अभिभावकको उपस्थितिमा जोडीहरुको हिन्दू परम्पराबमोजिम वैवाहिक कार्यक्रम गरिने धामले जनाएको छ ।
सामूहिक विवाहका लागि रु. ६० लाख खर्च लाग्ने अनुमान गरिएको छ । पच्चिस जोडीको विवाहमा लाग्ने सबै खर्च अर्जुनधारा धाम विकास समितिका अध्यक्ष नविन गट्टानीले व्यहोर्ने बताउनु भएको छ । उहाँले आफ्नो बैबाहिक रजत बर्षगाँठको अवसरमा उक्त खर्च व्यहोरिदिने बताउनुभयो ।
“मैले राम्रो कार्यको सुरुवात होस् भनेर पहिलो वर्षको सम्पूर्ण खर्च व्यहोर्ने भएको हुँ,” धामका अध्यक्ष गट्टानीले भन्नुभयो–“अर्को बर्षदेखि मन्दिर आफैंले निरन्तर रुपमा यस उत्सवलाई अगाडि बढाउनेछ ।”
उहाँले सामूहिक विवाहमा बरबधुलाई आवश्यक पर्ने श्रृंगारिक कपडा, बेहुलीलाई वेहुलाको तर्फबाट लगाइने पोतेसहितको सुनको तिलहरी, गाग्री खड्कुलासहित भाडा बर्तन र शुद्ध शाकाहरी खानाको व्यवस्था गरिने बताउनुभयो । विवाहमा हरेक बरबधुको तर्फबाट दश–दश जनाका दरले जन्ती तथा घरगाउँलेलाई उपस्थिति गराउन सकिने जनाइएको छ । विवाहमा दाइजो निषेध गरिएको छ ।
धाम समितिका कोषाध्यक्ष जोशीले विवाहका लागि इच्छुक जोडीका अभिभावकहरुले पालिकाले २० वर्ष उमेर पूरा भएको खुल्नेगरी दिएको सिफारिस पत्रसहित नेपाली नागरिकता वा जन्मदर्ताको प्रतिलिपी, र पासपोर्ट साइजको दुई प्रति तस्वीरसहित धाममा सम्पर्क गर्नुपर्ने र धामले तोकेको फाराम भर्नुपर्ने बताउनुभयो ।
“सामाजिक दायित्व पूरा गर्ने नयाँ राम्रो कार्य गरौं भन्ने उद्देश्यले सामूहिक विवाहको आयोजना गरिएको हो,” उहाँले भन्नुभयो– “धाम समितिले अर्को बर्षदेखि १०८ जोडीको सामूहिक विवाह गर्ने लक्ष्य राखेको छ ।”
सामूहिक विवाहको आयोजना सम्बन्धी जानकारी पाएर केही जोडीले धाममा नाम टिपाइसकेको उहाँले बताउनुभयो । प्रत्येक विवाहका लागि चाहिने मण्डप र पण्डित छुट्टाछुट्टै व्यवस्था गरिने भएको छ । आयोजकले तोकेको समयमा विवाहका लागि धामसम्म जान र घर फर्किनका लागि लाग्ने खर्च बरबधु पक्षले नै व्यहोर्नु पर्ने धाम समितिले जनाएको छ ।
