१३ वैशाख २०८२, शनिवार
पथरी - मोरङको पथरीशनिश्चरे वडा नम्बर २ मा रहेको चिनारी बोर्डिङले बिहीबार आफ्नो १५ औं वार्षिकोत्सव सम्पन्न गरेको छ।
विद्यालयले विभिन्न सांगीतिक कार्यक्रम तथा पुरस्कार वितरणसहित वार्षिकोत्सव तथा अभिभावक दिवस सम्पन्न गरेको हो।
विद्यालयका संस्थापक वीरेन साम्वाको अध्यक्षतामा सम्पन्न वार्षिकोत्सव तथा अभिभावक दिवसमा पथरीशनिश्चरे वडा नम्बर २ का वडाध्यक्ष नैना राईको प्रमुख आतिथ्यता रहेको थियो।
कार्यक्रममा बोल्दै प्रमुख अतिथि राईले किताबी ज्ञान मात्र मानव जीवनमा पर्याप्त नहुने हुँदा अब सिपमुलक शिक्षामा पनि जोड दिनुपर्ने बताए। उनले ‘एक विद्यालय, एक सिप’को अभियान नगरपालिकाले सञ्चालन गर्न लागेको बताए।
कार्यक्रमका अवसरमा बोर्डिङले हरेक वर्ष गर्दै आएको उत्कृष्ट शिक्षक सम्मान तथा प्रोत्साहन यस पटक शिक्षिका मेरी पुलामीलाई गरेको छ। विद्यालयले विभिन्न क्रियाकलापमा उत्कृष्ट हुनेहरूलाई पुरस्कृत समेत गरेको थियो।
