झापा, १६ फागुन । मेचीनगरमा क्रियाशील प्रतिष्ठानहरुले साहित्य, कला, संंस्कृति, संगीत लगायतको विकास र जगेर्नाका लागि नगरस्तरीय प्रतिष्ठान स्थापनाको माग गरेका छन् ।

लाल भागीरथा बानियाँ प्रतिष्ठानको आयोजनामा आज धुलाबारीको शुभारम्भ रेस्टुरेन्टमा सम्पन्न प्रतिष्ठानहरुको प्रथम ऐतिहासिक भेलाले उक्त माग गरेको हो ।

भेलाको निष्कर्षमा भनिएको छ–“नगरभित्रका विभिन्न कला, साहित्य, सिर्जनात्मक कार्य, संस्कृति आदिको विकास, जगेर्ना तथा उन्नयनको काममा निरन्तर नेतृत्व गर्ने स्थानीय सरकारलाई नगरस्तरीय प्रतिष्ठानको स्थापना गरी सञ्चालन गर्न अनुरोध गर्दछौं ।”

प्रतिष्ठानहरुका तर्फबाट उक्त माग बारे मेचीनगर नगरपालिकाका नगरप्रमुख, उपप्रमुख, प्रमुख प्रशासकीय अधिकृत लगायतलाई औपचारिक रुपमा अवगत गराउन प्रतिनिधिमण्डल जाने र त्यसको अगुवाई लाल भागीरथा बानियाँ प्रतिष्ठानका अध्यक्ष हरिचरण बानियाँले गर्ने भेलाले निर्णय गरेको छ ।

प्रमुख अतिथि एवम् कोशी प्रदेश सरकारका आर्थिक मामिला तथा योजना मन्त्री राम रानामगरले भेलाको उद्घाटन गर्नु भएको थियो । सो अवसरमा कोशी प्रदेश सरकारको मुख्यमन्त्री कार्यालयकी राज्यमन्त्री सिर्जना राई, मेचीनगर नगरपालिकाका नगरप्रमुख गोपाल बुढाथोकीको विशेष आतिथ्यता रहेको थियो ।

मन्त्री रानामगर र नगरप्रमुख बुढाथोकीले शुभकामना मन्तब्यको क्रममा मेचीनगरका प्रतिष्ठानहरुले समाज रुपान्तरणमा महत्त्वपूर्ण योगदान दिइरहेको चर्चा गर्दै सरकारको तर्फबाट आवश्यक सहयोग गरिने प्रतिवद्धता व्यक्त गर्नु भएको थियो ।

भेलामा सहिद विश्वनाथ घिमिरे स्मृति प्रतिष्ठानका अध्यक्ष राम कट्टेल, साहित्यकार तेराख प्रतिष्ठानका अध्यक्ष शिवकुमार पौड्याल र संरक्षक लेखनाथ खतिवडा, पवित्रा भेषराज खतिवडा स्मृति प्रतिष्ठानका अध्यक्ष शिरो सान्दाई, सहिद वीरेन स्मृति प्रतिष्ठानका अध्यक्ष पदम गौतम, सुसेली साहित्यिक परिवारका अध्यक्ष पुण्यप्रसाद खरेल, पुण्यप्रसाद न्यौपाने स्मृति प्रतिष्ठानका अध्यक्ष कमलप्रसाद न्यौपाने, रण खड्ग खवास फाउन्डेसनका अध्यक्ष भीम खवास, गोवा हरिनारायण भाग्य रुपा सिग्देल स्मृति प्रतिष्ठानका अध्यक्ष लक्ष्मीप्रसाद सिग्देल, लाल भागिरथा बानियाँ प्रतिष्ठानका अध्यक्ष हरिचरण बानियाँ, उपाध्याक्ष मनोज बानियाँ, सचिव डम्बर देउजा, सदस्य भाष्कर घिमिरे, पत्रकार मोहन काजी र मेचीनगर नगरपालिकाका प्रेस संयोजक अर्जुन कार्कीको उपस्थिति रहेको थियो । 

भेलामा प्रतिष्ठानहरुका तर्फबाट आआफ्नो संस्थाको परिचय, उद्देश्य र गतिविधि प्रस्तुत गरिएको थियो । आगामी दिनमा प्रतिष्ठानहरुबीचको सहकार्यलाई अझ सुदृढ बनाउने र आलोपालो भेलाको आयोजना गर्ने भेलामा निर्णय भएको छ ।

भेलाको अध्यक्षता लाल भागीरथा बानियाँ प्रतिष्ठानका अध्यक्ष हरिचरण बानियाँले गर्नु भएको थियो ।