झापा, २१ फागुन । सहिद वीरेन राजबंशीको स्मृतिमा नेकपा एमाले मेचीनगरले आज ज्यामिरगढीमा श्रद्धाञ्जलि सभा सम्पन्न गरेको छ ।

मेचीनगर वडा नं. १५ स्थित सहिद वीरेन राजबंशी स्मृति प्रतिष्ठानमा आयोजित सभाको प्रमुख अतिथि नेकपा एमालेका केन्द्रीय सदस्य एवम् संविधानसभा सदस्य रविन कोइराला हुनुहुन्थ्यो ।

प्रतिष्ठन परिसरमा रहेका सहिद वीरेन राजबंशीको सालिकमा माल्यार्पण गरेर सुरु भएको सभामा प्रमुख अतिथि कोइराला, पार्टीका केन्द्रीय सल्लाहकार हरिचरण बानियाँ र कम्युनिस्ट योद्धा एवम् नेपाल पत्रकार महासंघका पूर्व महासचिव चन्द्र भण्डारीले मन्तबयको क्रममा झापा विद्रोहका सहिदहरुले देखाएको बाटो नभुल्न खबरदारी गर्नु भएको थियो ।

नेकपा एमाले मेचीनगर अध्यक्ष राजु कार्कीको अध्यक्षतामा भएको कार्यक्रममा प्रतिष्ठानका अध्यक्ष पदम गौतमले स्वागत मन्तब्यसहित प्रतिष्ठानले गरिरहेका गतिविधिको चर्चा गर्नु भएको थियो ।

सहिद वीरेन राजबंशीका जेठा छोरा नेत्र राजबंशी, झापा विद्रोहमा १७ वर्ष जेल जीवन बिताउनु भएको झापा विद्रोहका नायक सानो दुर्गा अधिकारी, सहिद वीरेन राजबंशीकी बुहारी बिमला राजबंशी र सहिद परिवारका सदस्य कुमार मेचे गरी चार जना सहिद तथा योद्धा परिवारलाई पार्टीका तर्फबाट सम्मान गरिएको थियो ।

कार्यक्रममा मेचीनगर नगरपालिकाका नगरप्रमुख गोपाल बुढाथोकी, उपप्रमुख एवम् एमाले केन्द्रीय सदस्य मीना उप्रेती, केन्द्रीय सल्लाहकार विष्णु प्रसाई, केन्द्रीय सल्लाहकार भीम खवास लगायत पार्टीका कार्यकर्ताहरुको बाक्लो उपस्थिति रहेको थियो । 

पार्टीका वडा नं. १५ का अध्यक्ष चेतन बिष्टले सञ्चालन गरेको कार्यक्रममा राजबंशी भाषाको स्वागत गीतमा राजबंशी परिहनसहित नृत्य प्रस्तुत गरिएको थियो ।