१३ वैशाख २०८२, शनिवार
झापा, २१ फागुन । अमेरिकाले ८ जना नेपालीलाई आफ्नै बिमानमार्फत काठमाडौं ल्याएर छाडिदिएको छ ।
आप्रवासीलाई कठोर व्यवहारसहित देश निकाला गर्दै आएको अमेरिकी प्रशासनले आज विहान १० बजे नेपालीलाई ल्याउन त्रिभुवन बिमानस्थलमा अमेरिकी बिमान ओरालेको हो ।
आइपुगेका ८ जनामा एक महिला र सात पुरुष छन् । यो विमान अमेरिकाको न्यु ह्याम्पसर राज्यको पोर्टसमाउथ अन्तर्राष्ट्रिय विमानस्थलबाट काठमाडौं आएको हो ।
अवैधानिक आप्रवासी निष्कासन गर्ने ट्रम्पको नीति अनुसार उनीहरूलाई नेपाल छोडिएको हो ।
यससहित ट्रम्पको आदेश अनुसार देश निकाला हुने नेपालीको संख्या ३७ पुगेको छ । यसअघि २७ नेपाली काठमाडौं फर्किएका थिए । तर अमेरिका सरकारले नेपालीलाई नेपालमै ल्याएर छोडिदिएको भने यो पहिलो घटना हो ।
छिमेकी भारतको पञ्जावमा अमेरिकाले सैनिक बिमान पठाएर भारतीय आप्रवासीलाई छाडिदिएको थियो ।
नेपाल आइपुगेका नेपालीहरुलाई अभ्यागमन कार्यालयले प्रहरीको जिम्मा लगाइदिएको छ । उनीहरुमाथि सोधपुछ भइरहेको बताइएको छ ।
