२० चैत २०८१, बिहिवार
झापा, २२ फागुन । कालजयी गीतहरुको स्रष्टा, जनवादी गायक, अग्रज पत्रकार एवम् राजनीतिक योद्धा चन्द्र भण्डारीले बुधवार ५२ औं सुखानी स्मृति दिवसको अवसरमा नेकपा एमाले झापाबाट आयोजित कार्यक्रममा विशेष सांगीतिक प्रस्तुति दिनु भएको छ ।
विर्तामोडस्थित पार्टी कार्यालयमा राष्ट्रिय जनसांस्कृतिक महासंघ झापाले सुरु गरेको ‘स्रष्टा आवाजको पहिलो भाग’मा उहाँले विशेष सांगीतिक प्रस्तुति दिनु भएको हो । उहाँले आफ्ना रचनाका सुमधुर, जोशिला र प्रेरणादायी एक दर्जनभन्दा बढी जनवादी गीतहरु गाउनु भएको थियो ।
‘भीर पखेरामा हाम्रो झण्डा खोइ.....’ भन्दै गाउन सुरु गर्नु भएको उहाँले ‘यो माटोभरि हाम्रै रगत पसिना भिजेको छ....’ भन्ने गीत गाउँदा हल तालीले गुञ्जिएको थियो ।
उहाँले सो गीत २०३५ सालतिर रेडियो नेपालमा रेकर्ड गराएको र पछि त्यही गीतका कारण राजद्रोहको मुद्धामा साढे ३ वर्ष जेल बस्नु परेको बताउनुभयो ।
भण्डारीले सो अवसरमा २०२७ सालमा टिस्टामा पिकनिक खान गएका बेला गाउनु भएको पहिलो गीतदेखि भर्खरै रेकर्ड गरिएका नयाँ गीत समेत गाएर दर्शकलाई मन्त्रमुग्ध बनाउनु भएको थियो ।
गीत र संगीत रचनामा निरन्तर लागिरहेको बताउँदै उहाँले हालसम्म ३०० वटा गीत रचना गरिसकेको जानकारी दिनुभयो । पञ्चायती निरंकुश शासनविरुद्ध राजनीतिक आन्दोलनका क्रममा मुलुकका ११ वटा जेलमा राजबन्दीको जीवन बिताउँदा धेरैजसो गीत रचेको उहाँको भनाई थियो ।
२०३९ सालमा पार्टीमा अन्तरविरोध उत्कर्षमा पुग्दा नेताहरुलाई सम्झाउँदै उहाँले रचना गरेर स्वर भरेको ‘भुइँकुहिरो उड्न थाल्यो है...’ बोलको गीत चर्चित भएको थियो । उक्त गीतको केही अन्तरा उहाँले गाएर सुनाउनुभयो ।
चुनावमा मात्र कलाकारलाई प्रयोग गर्ने र अरुबेला वेवास्ता गर्ने परिपाटीको चर्को आलोचना गर्दै उहाँले क्रान्तिकारी सन्देश बोकेको आफ्नै रचनाको ‘मुठ्ठी उचाली लड्छौं बढ्छौं देशका लागि......’ बोलको गीत गाउँदा हलका दर्शक छमछमी नाचेका थिए ।
कार्यक्रममा प्रमुख अतिथि एवम् नेकपा एमालेका केन्द्रीय उपाध्यक्ष गुरु बरालले जनवादी संगीत नेपालको कम्युनिस्ट आन्दोलनको अभिन्न अंग भएको बताउँदै पार्टीका तर्फबाट स्रष्टा भण्डारीलाई कदरपत्रसहित सम्मान गर्नु भएको थियो ।
कार्यक्रममा प्रमुख अतिथि बरालले २०६२ को जनान्दोलनमा सहिद हुनुभएको सुरज विश्वासकी आमालाई पनि सम्मान गर्नु भएको थियो ।
भुपाल शिवाकोटीले सञ्चालन गर्नु भएको कार्यक्रममा राष्ट्रिय जनसांस्कृतिक महासंघ झापाका अध्यक्ष कुमार सुबेदी, मोहन बिक, रक्षा तिम्सिना लगायतले गीत गाउनु भएको थियो ।
