मेचीनगर, २२ फागुन । जरा फाउण्डेशनले पत्रकार चन्द्र भण्डारसहित साहित्यकार र विद्यार्थीलाई सम्मानति गरेको छ । 

बलभद्र जनता माविको ६५ औँ बार्षिकोत्सवमा विद्यालयमा कृष्णप्रसाद प्रसाईले बुबा जय र आमा राधादेवी प्रसाई (जरा) को स्मृतिमा स्थापना गरेको फाउण्डेशनले सञ्चार विद्या पुरस्कारबाट अग्रज पत्रकार भण्डारी र साहित्यतर्फबाट भारत सिलगुढीका डा. भीखीप्रसाद ‘विरेन्द्र’ सम्मानित हुनुभएको हो । 

उहाँहरु दुवैजनालाई आज प्रमुख अतिथि मेचीनगर नगरपालिकाका प्रमुख गोपालचन्द्र बुढाथोकीले जनही रु. १५ हजारका दरले पुरस्कृत गर्नुभएको छ ।  सोही कार्यक्रममा कक्षा १२ का जेहेन्दार विद्यार्थी यूनिक मेचे र प्रियांशा उप्रतीलाई नगद रु. पाँच हजारका दरले पुरस्कृत गरिएको छ । फाउण्डेशनको नाममा स्थापना भएको चार वटा विद्याको पुरस्कार प्रत्येक वर्ष विद्यालयले वितरण गर्दै आएको छ । 

यसैगरी विद्यालयमा स्थापना गरेका थुप्रै छात्रवृत्ति र अक्षय कोषबाट शिक्षक तथा विद्यार्थी र दाताहरुलाई सम्मान गरिएको छ । शिक्षक होमराज ढकाललाई दुर्गादेवी सिटौला स्मृति कोषले सम्मान गरेको थियो । ढकाल नेपाल शिक्षक महासंघ मेचीनगरका अध्यक्ष समेत हुनुहुन्छ । पुन्यप्रसाद प्रसाई स्मृति कोषका संरक्षक बागमती प्रदेशका पूर्व प्रदेश प्रमुख विष्णु प्रसाई, मदन भण्डारी फाउण्डेशन कोषका संरक्षक पूर्व सांसद हरिचरण शिवाकोटी लगायतले विद्यार्थीलाई छात्रवृत्ति वितरण गरेका थिए । 

कार्यक्रममा मेचीनगर–११ का वडाध्यक्ष रुद्र डाँगी, राष्ट्रिय सभाका पूर्व सदस्य हरिचरण बानियाँ, नेपाल शिक्षक महासंघ कोशी प्रदेशका अध्यक्ष तेजु चौलागाई लगायत समाजसेवीहरुको उपस्थिति रहेको थियो ।

बलभद्र जनता माविका व्यवस्थापन समिति अध्यक्ष शान्तिराम चिमरियाको अध्यक्षतामा सम्पन्न कार्यक्रमको स्वागतसहित विद्यालयको बार्षिक प्रतिवेदन प्रधानाध्यापक तुलसीप्रसाद सुवेदीले प्रस्तुत गर्नुभएको थियो । कार्यक्रमको सञ्चालन शिक्षक टिकेन्द्र खनालले गर्नुभएको थियो ।