१७ मंसिर २०८२, मङ्गलवार
झापा, १८ कात्तिक । शिवसताक्षीस्थित दुधे रंगशालामा जारी एलभिडी झापा महिला गोल्डकपमा आज भएको खेलमा विभागीय टोली एपीएफ फुटबल क्लब काठमाडौँ बिजयी बनेको छ ।
एपीएफले पाहुना टोली सिक्किमको सिंग्लिङ स्पोर्टिङ क्लबलाई ७–० को फराकिलो अन्तरले पराजित गरेको हो । यो जितसँगै एपीएफ टोली प्रतियोगिताको सेमिफाइनलमा प्रवेश गरेको छ ।
एपीएफले खेलको २९ औँ मिनेटमा सविता राना मगरको पहिलो गोल र ३८ औँ मिनेटमा अनिता बस्नेतको दोस्रो गोलमार्फत अग्रता बढाएको थियो ।
पहिलो हाफको इन्ज्युरी समयमा एपीएफले लगातार दुई गोल थपेको थियो भने ४१ औँ मिनेटमा एपीएफकी रश्मिकुमारी घिसिङले र इन्जुरी समयमा अनिता बस्नेतले अर्को गोल थपेकी थिइन् । पहिलो हाफमै एपीएफले पाँच गोलका साथ अग्रता लिएको थियो ।
दोस्रो हाफमा एपीएफकी अनिता केसीले ७१ औँ मिनेटमा र ८४ औँ मिनेटमा रश्मिकुमारीले गोल थपेका थिए ।
सिक्किमकी प्रशिक्षक लाकु फुर्बी भुटियाले यो हारलाई सिकाइ अनुभवका रूपमा लिएको बताउनु भएको छ । “हाम्रो टोली युवा छ, आगामी खेलहरूमा सुधार गर्नेछौं,” उहाँको भनाई थियो ।
