२२ चैत २०८१, शनिवार

कृषि

पूर्वीनाकाबाट आठ महिनामा पौने १८ अर्बको कृषिजन्य बस्तु निर्यात

२१ चैत २०८१, शुक्रवार
Image

झापा, २२ चैत । पूर्वीनाका काँकडभिट्टाबाट चालू आर्थिक वर्ष २०८१/०८२ को आठ महिनामा रु. १७ अर्ब ७४ करोड १३ लाख ५६ हजारको कृषिजन्य वस्तु भारत निर्यात भएको प्लान्ट क्वारेन्टाइन कार्यालय काँकडभिट्टाले जनाएको छ ।

साउनदेखि फागुन मसान्तसम्मको उक्त अवधिमा रु. दुई अर्ब ४० करोड ४६ लाख ७२ हजार मूल्य बराबरको कृषि बस्तु सोही नाका भएर भारतबाट आयात भएको कार्यालयका सूचना अधिकारी चन्द्रेश्वर ठाकुरले बताउनुभायो ।

पूर्वीनाका मार्फत भारतसँग हुने कृषि बस्तुको व्यापारमा नेपाल नाफामा रहेको तथ्यांकले देखाउँछ । यस नाकाबाट नेपालले अदुवा, अलैची, अम्लिसो, प्लाई सिट, भेनियर सिट, चिया, जडिबुटी, मसुरो दाल, बन्दा कोभी, मोलासस लगायतका कृषि उत्पादन भारततर्फ निर्यात गर्दै आएको छ ।

बिगत आठ महिनामा पूर्वीनाका भएर नेपालले रु. पाँच अर्ब २४ करोड ४० लाख मूल्य बराबरको दुई हजार ६२२ मेट्रिक टन अलैची भारत निर्यात गरेको छ ।

यसैगरी, सोही अवधिमा रु. आठ अर्ब २० करोड ९६ लाख मूल्य बराबरको ११ हजार ७२८ मेट्रिक टन चिया भारततर्फ निर्यात भएको छ भने रु. दुई अर्ब ७३ करोड ६३ लाख ५२ हजार मूल्य बराबरको प्लाई तथा भेनियर पाता निर्यात भएको छ ।

प्लान्ट क्वारेन्टाइन कार्यालय काँकडभिट्टाको तथ्यांक अनुसार उक्त अवधिमा नेपालबाट रु. ७६ करोड ९७ लाख ६० हजार मूल्य बराबरको नौ हजार ६२२ मेट्रिक टन अम्लिसो, रु. २६ करोड ६३ लाख चार हजार मूल्य बराबरको दुई हजार ९१ मेट्रिक टन अदुवा, रु. चार करोड २६ लाख ७३ हजार मूल्य बराबरको १४६ मेट्रिक टन जडिबुटी, रु. आठ करोड १७ लाख ९२ हजार मूल्य बराबरको पाँच हजार १११ मेट्रिक टन बन्दा कोभी, रु. चार करोड एक लाख ७६ हजार मूल्य बराबरको २७९ मेट्रिक टन मुसुरो दाल, रु. २० करोड २२ लाख मूल्य बराबरको १३ हजार ४८० मेट्रिक टन मोलासस र रु. १४ करोड ५५ लाख ९९ हजार मूल्य बराबरको सात हजार ४६५ मेट्रिक टन अन्य कृषि बस्तु भारत निर्यात भएको छ ।

यसैगरी, चालू आवको आठ महिनामा भारतबाट सबैभन्दा बढी लसुन आयात भएको पाइएको छ । धेरै आयातित कृषि बस्तुमा ताजा तरकारी, गेडागुडी, आलु, ताजा फलफूल र कोदो बाली रहेका छन् ।

उक्त अवधिमा भारतबाट रु. ६२ करोड ४६ लाख मूल्य बराबरको पाँच हजार २०५ मेट्रिक टन लसुन नेपालमा आयात भएको छ । 

आठ महिनामा रु. ५३ करोड ५३ लाख ८५ हजार मूल्य बराबरको पाँच हजार २३२ मेट्रिक टन गेडागुडी (दलहन), रु. २८ करोड ८७ लाख ५३ हजार मूल्य बराबरको १५ हजार ७१० मेट्रिक टन ताजा तरकारी, रु. १३ करोड १७ लाख १२ हजार मूल्य बराबरको दुई हजार ७४४ मेट्रिक टन कोदो, रु. २८ करोड ९१ लाख चार हजार मूल्य बराबरको १२ हजार ४६ मेट्रिक टन आलु, रु. चार करोड ९७ लाख २५ हजार मूल्य बराबरको ६६३ मेट्रिक टन चामल, रु पाँच करोड ५० लाख २९ हजार मूल्य बराबरको एक हजार ४११ मेट्रिक टन पशु दाना (मकै) र रु. तीन  करोड ५८ लाख ६० हजार मूल्य बराबरको एक हजार ६३० मेट्रिक टन ब्रान र रु. १३ करोड सात लाख २६ हजार मूल्य बराबरको तीन हजार ६४९ मेट्रिक टन अन्य कृषि बस्तु आयात भएको छ ।