अम्बिका भण्डारी
झापा, १५ फागुन (रासस) ः नेपालमा रबर खेती सुरु भएको ३० वर्षपछि झापामा रबर उद्योग स्थापना भएको छ ।
कनकाई नगरपालिका वडा नं. ७ मा रु. २० करोडको लगानीमा स्थापित कनकाई रबर इन्डस्ट्रिज सञ्चालनको अन्तिम तयारीमा छ ।
२०४६ सालमा गोरखामा गोरखकाली रबर उद्योग स्थापना भएसँगै झापाको शनिश्चरेमा पहिलोपल्ट परीक्षणको रुपमा रबरको विरुवा रोपिएको थियो ।
शनिश्चरेका जयप्रसाद ढकाल र उनको परिवारले पाँच हेक्टर जग्गामा पहिलोपल्ट रबर खेती गर्नुभएको थियो । हाल झापा, मोरङ र सुनसरीमा करीव ७०० हेक्टरमा रबरको खेती भइरहेको छ ।
रबरको खेती फस्टाउँदै गएपछि स्वदेशमै उद्योग सञ्चालनको आवश्यकता महसुस गरी काठमाडौं र झापाका लगानीकर्ताले साझेदारीमा कनकाई रबर इन्डस्ट्रिज स्थापना गरेका हुन् ।
डेढ बिगाहा जग्गामा फैलिएको रबर उद्योगले यसै बर्षदेखि किसानले उत्पादन गरेको रबरको चोप खरिद गर्ने जनाएको छ । उद्योगले प्रति घण्टा एक हजार लिटर रबरको चोप प्रशोधन गर्ने भएको छ ।
किसानबाट खरिद गरेको रबरको चोपलाई आधुनिक मेसिनमा प्रशोधन गरी पहिलो चरणमा जुत्ता चप्पलमा प्रयोग हुने सुलेसन (टाँस्ने पदार्थ) र रबर सोल उत्पादन गरिने सञ्चालक बालकृष्ण सापकोटाले बताए ।
नेपालमा सयौंको संख्यामा रहेका जुत्ता चप्पल उद्योगले यहाँबाट उत्पादित सुलेसन र सोल प्रयोगमा ल्याउने सञ्चालकहरुको अपेक्षा छ । हालसम्म ती उद्योगहरुले यस्तो पदार्थ भारतको केरला, भियतनाम र थाइल्यान्डबाट आयात गर्दै आएका थिए ।
दुई महिनापछि सुलेसन र सोल उत्पादन थालिने सञ्चालक सापकोटाको भनाई छ । त्यसपछि दोस्रो चरणमा मेडिकल क्षेत्रमा प्रयोग हुने ग्लोब र घरायसी प्रयोगमा आउने म्याट उत्पादन गर्ने उद्योगको लक्ष्य रहेको उनले बताए ।
विश्वमा रबर दुई किसिमले उत्पादन हुन्छ । पेट्रोलियम खनिज पदार्थलाई प्रशोधन गरेर र रबरको विरुवा रोपेर रबर उत्पादन हुँदै आएको छ ।
विरुवा रोपेर उत्पादन हुने रबर प्राकृतिक हुने भएको हुँदा यसको विश्वभरि उच्च माग छ । यातायातका साधनहरु साइकलदेखि हवाइजहाजको टायर र ट्युब बनाउन पनि रबरको आवश्यकता पर्दछ ।
नेपालले बर्षेनी अर्बौको रबर आयात गर्दै आएको छ । तर रबर खेती र यसमा आधारित उद्योगहरु खुल्दै जाने हो भने ठूलो मात्रामा आयात प्रतिष्थापित हुने सम्भावना रहेको छ ।
गर्मी क्षेत्रमा रबरको बोट हुर्किन्छ । यसको फेदबाट दुध जस्तो चोप निकालेर संकलन गरिने र संकलित चोपलाई प्रशोधन गर्दा प्राकृतिक रबर उत्पादन हुने गर्दछ ।
नेपालमा गोरखकाली रबर उद्योगले झापामा उत्पादित केही रबर विगतदेखि खरिद गर्दै आएको थियो । तर उद्योग नै धराशायी बनेपछि किसानहरुले रबरका पाप्रा बनाएर भारतमा बेच्दै आएका थिए ।
कनकाई रबर इन्डस्ट्रिजले अब किसानले बगानमै उत्पादन गरेको कच्चा चोप खरिद गरी लैजाने भएको छ । झापामा उत्पादन हुने सबै चोप खरिद गरिने उद्योगका सञ्चालक सापकोटाले बताए ।
झापामा सामुदायिक बन, एग्रो फरेस्ट्री लगायतका संस्थाले धेरै जग्गामा रबर खेती गरेका छन् भने करेसाबारीमा १० बोटदेखि दशौं बिगाहा जग्गामा हजारौं बोट रबर हुर्काउने किसानको संख्या झापामा सयौं रहेको छ ।
किसानहरुले खेती नहुने पाखो र बगर जग्गामा रबर लगाएर प्रति बिगाहा रु. ४ लाखसम्म वर्षेनी आम्दानी गर्दै आएका छन् । रबरको चोप मात्र नभएर यसका दाउरा र काठ महँगोमा विक्री हुने गरेको छ भने रबर खेती लगाएको स्थानमा मौरीपालन फस्टाउने गर्दछ ।
गिरिजाप्रसाद कोइराला फाउन्डेसनले झापाको बुद्धशान्ति गाउँपालिकाको वडा नं. ८ लाई रबर ग्राम घोषणा गर्दै नमुना रबर खेतीका लागि सहयोग पुर्याउने भएको छ ।
एग्रो टुरिज्मको अवधारणा बमोजिम बुद्धशान्तिमा नमुनाको रुपमा रबर ग्राम परियोजना सुरु गरिएको रबर ग्रामका सचिव सिताराम बाँस्तोलाले बताए । फाउन्डेसनले भारतबाट उन्नत जातको विरुवा ल्याएर किसानलाई बाँड्ने र प्राविधिक सहयोग पुर्याउने उनको भनाई छ ।
रबर ग्राममा साना किसानलाई समेटिने र लघु उद्योग सञ्चालन गरी नोट बाँध्ने रोल रबर र इरेजर उत्पादन गरिने उनले जानकारी दिए । फाउन्डेसनले लघु उद्योग सञ्चालनका लागि प्राविधिक र आर्थिक सहयोग दिलाउने भएको छ ।
रबर बोटमा फल्छ भन्ने हेर्नका लागि समेत रबर ग्राममा पर्यटक आकर्षित हुने सम्भावनालाई मध्यनजर गरेर घरबास सञ्चालनका लागि समेत फाउन्डेसनले पहल गर्ने भएको छ ।
झापाको बाह्रदशीमा समेत अर्को रबर उद्योग स्थापनाको तयारी भइरहेको छ । रबरको उत्पादन बर्षेनी बढ्दै गएको हुँदा प्रशोधन उद्योग खुल्ने क्रम अझ बढ्ने सम्भावना छ ।
नेपालमा रबर खेतीको सम्भावना छ भनी पहिलो अनुसन्धान गर्ने विज्ञ तिलक भण्डारी हुन् । उनले रबर खेती सुरु भएको तीन दशक पछि झापामा उद्योग स्थापना हुनु निकै ढिलो भए तापनि खुशी मान्नु पर्ने बताए ।
नेपालकै पहिलो रबर उद्योग गोरखकाली रबर उद्योग हो । गोरखामा रबर खेती नफस्टाएपछि उक्त उद्योगले झापाको कच्चा पदार्थमा निर्भर हुनुपरेको थियो । पछि विभिन्न कारणले गोरखकाली रबर उद्योग धराशायी हुन पुग्यो ।
‘‘अब किसानको उत्पादनले जिल्लाभित्रै बजार पाउने भयो,” रबर खेती विज्ञ भण्डारीले भने–“झापामा खाली र बगर जग्गा थुप्रै छ, त्यहाँ खेती विस्तार गर्न सके देशकै लागि फाइदा हुन्छ ।”
झापाको माइपश्चिम क्षेत्रमा राजमार्गभन्दा उत्तरी इलाकामा रहेको रतुवामाई वृक्षारोपण आयोजनामा रबर खेती लगाउने हो भने मुलुक रबरमा आत्मनिर्भर बन्न सक्ने देखिएको छ । आयोजनाको हजारौं हेक्टर जग्गा खाली छ भने सिसौ, मसला जस्ता कमसल रुख हुर्काउनुको साटो रबर खेती लगाउनु पर्नेमा राज्यको ध्यान आकृष्ट हुनु पर्ने कनकाई रबर इन्डस्ट्रिजका सञ्चालक बालकृष्ण सापकोटाले बताए ।–––
